另一個上個月看，今日才寫既展覽，而個展覽係至今個月27號，仲有三日，大家還是趕得切的！(小姐，你不如出年至寫！！)
Frank Gehry ~ Outside The Box Exhibition at ArtisTree
Frank Gehry法蘭克‧蓋瑞係我心目中建築界既巨人之一。大約十年前，第一次透過圖片睇到新落成既Guggenheim Museum，簡直係震撼我既心靈，呢座怪物係建築物？仲要係博物館！
位於布拉格既Dancing House，每一次睇，唔知點解都會諗起Munch既畫作 <吶喊>，兩件事係完全九唔搭八的。佢每座建築物都讓我目瞪口呆，因為佢突破建築既框框，方唔一定係方，圓唔一定要圓 (我寫緊咩呢) ，為現代建築寫下新一頁。
而香港點解會有佢既展覽呢？因為太古地產位於司徒拔道53號既豪宅OPUS HONG KONG，就係呢位建築巨人起的，將於2012年落成。呢個中半山豪宅，應該係佢咁多作品裡面最保守既一件，可能太古驚D富豪唔識欣賞滯銷咪弊！為了一睹大師件作，到時我一定會僑 裝 貴 婦 扮 睇 樓！
補充：
大家還是不知道Frank Gehry是誰？話說早幾年前，香港政府開始發展西九(吹水)項目，諗住邀請老人家參與的，點知老人家話要發展藝術，就不能只局限於西九，而係重新規劃整個維港兩岸；由於老人家太有遠見，太有計劃，最後政府以「不合招標準則」而不入最後三個後選名單。不過幸好老人家落選，香港政府沒有西班牙、英國、美國政府的胸襟，實會將大師群組作品攪到不倫不類。
又又又，其實有冇人話到俾我聽，呢個西九項目究竟幾時動工？何時完工？定抑或只係概念而矣？政府吹左拖左好多年，個西九都重係荒地一塊，到時又會話超支唔知幾多幾多錢。有呢個咁既政府，真係人都癲...
