上星期有幸被抽中出席高等法院的陪審團遴選，諗住早Ｄ出去食早餐，點知東隧東廊呢一日俾平日更塞車！連速食早餐都泡湯了。剛好九點四十分到達高院1樓會議室，睇片聽介紹流程，登記身份證後，一班候選佳麗就要上去指定法庭等抽籤。今次見到Ｄ人既衣著好正常，可能大家都諗冇咁翹抽中自己啩。第一個庭係販毒案，個犯盡用佢5個challenge既權利，凡係師奶、個樣老老實實、打側揹袋男人 (老實人？)都話唔要；有位男士被抽中，口窒窒咁同個官解釋自己下星期要去第二度做音樂會，已經買哂機票酒店，可唔可以豁免，個官問佢有咩證明，佢話冇，用樂譜得唔得，可能個官見佢緊張同老實啩，最後唔使佢做；跟住冇耐抽到位女士，佢話自己要去旅行，咁個官問佢幾時，佢話八月尾！大姐，個官一早咪話單案審5-6日之嘛，幾唔暢順都好，販毒唔使審廿日卦！法官即時話單野唔使咁耐同埋佢個時都放緊假，我即時笑左出黎！當選左7個人組成陪審團後，就逐個宣誓，跟手就開庭，其他抽唔中既（包括我）就要去第二個庭喇。
第二個庭係強姦案，都係審5-6日，好想被抽中，但絶對冇可能！因為辯方大律師一聽到係女士就即時challenge，最後係全男班上陣，而我11點鬆d就走得，搏大霧的我，下午當然趁機放假！
兩個庭都係用中文，有個候選陪審員係外國人，其中一個法官好耐心用英文解釋佢聽，同埋同佢講唔好意思，因為就算語言不通，佢都要企到抽完籤為止（對，係企，因為太多人，個庭太少位）。
今次有一位男士冇黎，點解我會知？因為係會議室登記完身份證之後，個職員大聲問ＸＸＸ先生係唔係度囉！唔知佢去左旅行、工幹、移左民、搬左屋所以收唔到通知？
而我，其實好想做的，見證一下嘛！
